Pottþétt moska!

Já nú megum við íslensku múslimarnir vera spenntir!

(Hamingjusamir múslimar... ekki photoshopvinna en hugsanlega stillt upp...)

Guð er vissulega mikill og réttlátur, og ég held að Hann sé að verðlauna okkur þolinmæðina með þessu gullna tækifæri til að heiðra Hann með einhverri glæsilegustu og sérstæðustu mosku Evrópu. Nusrat Jehan moskan í Köben er að vísu mjög skemmtileg en pínulítil og Perlan (al-Jumana?*) yrði í allt öðrum klassa, án þess að miklu þyrfti að breyta. Ég er kannski ekki alveg að sýna lítillætið sem Spámaðurinn, friður sé með honum, boðaði en maður hefur nú ekki það mikið að vera spenntur yfir þessa dagana að Guð hlýtur að fyrirgefa mér það, enda miskunnsamur og fyrirgefandi með eindæmum.

 (Nusrat Jehan moskan, Kaupmannahöfn)

 
Mér finnst það liggja í augum uppi að lítilláta, ljúfa og káta stórmennið Salman Tamimi (sem leikur sér aldrei úr máta), formaður félags Múslima á Íslandi, þurfi að drífa sig austureftir, funda þar með fjáðum hugsjónarmönnum og reyna að safna nægum pening til að koma þessu í kring--ég trúi ekki öðru en að það sé hægt að finna nokkra trúbræður sem sjá sér fært að láta nokkrar milljónir dollara úr vasa renna til að styrkja svo glæst framlag til Islam í einu fjarlægasta horni heimsins (frá Mekka séð, altént). 

 (inngangur Perlunnar, skyldi hann verða inngangur aj-Jumana* fyrr en síðar?)

Ég er meira að segja svo bjartur að halda að borgarbúar mundu ekki marséra í Öskjuhlíðina með heygaffla og blys þó það stæði til að breyta Perlunni í mosku! Vissulega yrði eitthvað smábakslag gegn henni fyrst um sinn--enda hefur sáning fræja tilgangslauss vantrausts á múslima náð að westan alla leið norður í frerinn hér á Fróni hvar hefur sprottið furðuvel úr þeim--en ég hef fullt traust á þeim, sem hæst munu tala gegn henni, til að sýna hlutlausum með tali sínu að mótmælin væru byggð á vanþekkingu og fordómum. Perlan verði moska, In sa Allah! Áfram Islam!

Með friði/Salaam/Shalom,

Durtur 

*Ég biðst velvirðingar ef al-Jumana þýðist í raun ekki sem "Perlan"--arabískan mín er því miður ennþá meira eða minna algerlega gagnslaus.

PS: Er það ekki líka rétt skilið hjá mér að ríkið yrði að taka þátt í kostnaði múslima við nýbyggingu til trúarbragðaiðkunar, þannig að ef við keyptum frekar Perluna værum við að spara íslenskum skattgreiðendum stórfé? Ég ég man rétt, frá því þegar ég hugðist stofna trúfélag í gamla daga, er ríkið skyldugt til að borga (ótrulega) stóran hluta kostnaðar við nýbyggingar viðurkenndra trúfélaga. Ég vona að það sé búið að breyta því en mig grunar að svo sé ekki; það hefur aldrei gengið eins smurt og stjórnarskráin stingur upp á að aðskilja ríki og trúfélög..

 (Þrjú dæmi um seðla sem væri hægt að spara ríkinu; ath að um þónokkur eintök af sumum þeirra gæti verið að ræða)

Perlan auglýst til sölu

Vita þeir í alvöru ekki betur?

"The Scene" er ekki eitthvað net eða samtök, heldur hreinlega orð (senan) sem er notað yfir hópa og einstaklinga sem reyna að komast í nýtt efni og koma því sem fyrst á vefinn, og það er heilmikil samkeppni í geiranum. Oftast fara þessi "scene release" eftir ákveðnum stöðlum og eru skýrð á ákveðin hátt eftir því hvaða þjöppunarstaðlar eru notaðir, hvernig myndin var tekin: TS fyrir bíóupptökur teknar úr salnum á myndavél, DVD-Rip fyrir myndir teknar af DVD diski, DVDSCR fyrir myndir teknar af DVD-myndum áður en þær fara í dreifingu, R5 er hliðræn upptaka af stafræna efninu o.sv.frv.

Þessir hópar og einstaklingar velja sér nöfn (ViTALITY eru öflugir í leikjum, MAXSPEED dæmi um bíóhóp/einstakling) og svo keppast þeir við að koma efni á netið til að fá virðingu niðurhalenda en umfram allt virðingu hvers annars. "The Scene" er semsagt þetta fyrirkomulag, ekki neinn ákveðinn hópur sem er í neinu ákveðnu landi eða neinni ákveðinni heimsálfu. Það er ekki hægt að uppræta hugtak, er það virkilega ekki að síast inn í hausinn á fólki ennþá?

Eins undarlegt og það virðist þá hefur ekki enn verið sýnt fram á að ólöglegt niðurhal skaði kvikmynda-, og tónlistarframleiðendur, þvert á móti (nema kannski hérna heima, hvar tónlist er munaðarvara); þetta hefur mun meiri áhrif á leikjaframeiðendur, en þeir eru að aðlagast ástandinu með því að bjóða upp á netspilun í leikjum sínum, sem óprúttnir leikjaniðurhalendur geta ekki nýtt sér. Framleiðendur á sjónvarpsefni eru farnir að auglýsa meira í þáttum sínum (auk auglýsingahléanna) og svo eru loksins farin að koma pínulogo í skjáhornin í "dauðum" senum, sem ég held að eigi eftir að vera endanleg lausn á þessu vandamáli með sjónvarpsþættina--því að þarna er komin gríðarlega mikil dreifing sem stöðvarnar þurfa ekki að borga krónu fyrir. Heimurinn er smám saman að lagast að þessum nýja veruleika sem við búum við. Þessi reglulegi leikþáttur í Svíþjóð er bara til að flækja málin og tefja það óumflýjanlega: Það er ekki hægt að stöðva þessa dreifingu á netinu. Punktur. 

Þeim sem skilja ekki hvað ég meina bendi ég á að gera litla tilraun með bestu torrentsíðu á netinu. Farðu á google og leitaðu að "other guys filetype:torrent", án gæsalappanna (beinn hlekkur). Hvar er herinn sem á að taka niður Google?

Evrópsk lögregla til atlögu við ólöglegt niðurhal

Kominn tími á að skera æxlið burt

Jæja.

Úr Stjórnarskrá Lýðveldisins Íslands:

62. gr. Hin evangeliska lúterska kirkja skal vera þjóðkirkja á Íslandi, og skal ríkisvaldið að því leyti styðja hana og vernda.
Breyta má þessu með lögum.

Er ekki löngu kominn tími til að breyta þessu með lögum og leggja niður íslensku þjóðkirkjuna? Fyrir utan að vera tímaskekkja og blóðsuga á íslensku samfélagi, er kirkjan á góðri leið með að vera helsti verjandi haturs og glæpa hérlendis og ef kirkjan getur ekki farið eftir lögum og almennu siðferði í landinu hlýtur að vera fásinna að við séum að styrkja þetta hyski, hvort heldur sem sé í orði eða fjáraustri.

Raunar segir 64. gr:

64. gr. [Enginn má neins í missa af borgaralegum og þjóðlegum réttindum fyrir sakir trúarbragða sinna, né heldur má nokkur fyrir þá sök skorast undan almennri þegnskyldu. [áhersla mín]

Nú gengur mér illa að fletta lögum þess tengdum upp, en er til of mikils mælst að ónáða þessa fínu herra með því að biðja þá um að, t.d., láta barnaverndaryfirvöld vita þegar verið að nauðga börnum? Nú er það nokk vel staðfest að barnaníður er helsta áhugamál þessara manna, en þeir hljóta að geta eitthvað tillit til okkar venjulegu aumingjanna tekið. Barnaverndarnefn segir "Öllum ber skylda til að tilkynna barnaverndarnefnd um kynferðislegt ofbeldi gegn börnum eða grun um slíkt." Öllum nema kirkjunnar mönnum, virðist vera.

Það er mikið til af trúfélögum hérlendis (enda blessunarlega trúfrelsi hér, í orði altént) og þau virðast flest standa sig fínt og sinna sínu fólki án þess að heimta fjárframlög frá ríkinu--væri það ekki bara hollt fyrir lúthersku kirkjuna að fá frelsi frá Ríkinu? Á meðan þeir sjá sér fært að mismuna fólki eftir kynhneigð, fela upplýsingar um nauðganir sínar á börnum og neita svo blákalt að fara eftir niðurskurði ríkisins sem heldur þeim gangandi--þegar ALLIR aðrir þurfa að sætta sig við það sem þeir fá--á ég gríðarlega erfitt með að sjá afhverju í ósköpunum við ættum einusinni að leyfa rekstur þessa fyrirbæris hérlendis, hvað þá að styrkja hann.

Þar sem ég ber litla von í hjarta mér um að ríkið taki af skarið og fjarlægi þetta forna æxli úr samfélaginu á næstu misserum, hvet ég alla eindregið til að segja sig úr þjóðkirkjunni. Þannig fær Háskóli Íslands þann pening sem ríkið greiðir kirkjunni núna fyrir að hafa þröngvað upp á þig skírn og fermingu í trú sem predikar ást og fyrigefningu, en stundar hatur og lygar; og guð veit--hvað sem þú kallar hann--að menntastofnunin Háskólinn á betra skilið en sá blettur á Íslandi sem hin Lútherska Þjóðkirkja er. 

Kynferðisbrot þögguð niður

Ubuntu Lite v.83

Þessi áform Google eru eiginlega bara nákvæmlega það sama og þeir eru að gera með GoS og Cloud sýnist mér: þetta á að vera Chrome vafrinn keyrandi á Linuxkjarna. Raunar er til bunki af eins "stýrikerfum" þarna úti nú þegar (t.d. Presto! og Splashtop). Voðalega finnst fólki þarna ytra gaman að halda áfram að finna upp hjólið aftur og aftur og aftur og...

Google áformar stýrikerfi

"Gæti"

Já nú þarf maður aldelis að fara að passa sig--svínaflensan gæti verið stórhættuleg, þó að hún sé engu skaðlegri en hin staðlaða, árlega flensa og dragi raunar færri til dauða en sú gamla, góða. Hún gæti líka stökkbreyst og eyðnismitaðir Afríkubúar sem flykkjast í sumarfrí til Mexíkó þessa dagana gætu verið í stórhættu. Það er þó ekki eintómt svartnætti framundan því að ef vaxtalækkun á Íslandi nymi sjö prósentum við inngöngu í ESB gætum við grætt 500 milljarða á ári, sem er eins gott, því það verður ekki ókeypis að byggja varnargarða--yfirborð sjávar gæti jú hækkað um 21 meter á næstu árum. Ansvítans klúður að hafa ekki keypt sér lottómiða um helgina, við hefðum þá getað verið þrír um hituna. Aftur á móti hefði ég getað étið béaðan lottómiðann fyrir einhvern misskilning og kafnað á kvikindinu. Eins gott að ég slapp við það því ég hefði auðveldlega getað steindrepist.

Gætu fjölmiðlar ekki allt eins farið að láta okkur vita hvað er að gerast í heiminum, frekar en að vera að velta sér uppúr hvað gæti hugsanlega gerst ef allt færi á versta veg? Hver veit, maður gæti þá jafnvel farið að taka eitthvað mark á því sem er borið er í mann. "Gæti" verandi lykilorðið.

Gæti haft mjög slæm áhrif í Afríku

Bloggvinir!

Núna á ég bloggvin og þá skilst mér að ég sé innvígður Bloggari. Ég er ennþá sár og ringlaður yfir því að hafa þurft að fórna tveim feitustu geitunum mínum líka en reglur eru víst reglur...

Takk, Sæli minn. Fyrirgefðu að ég hringi aldrei, og ég hlakka til að fara og fá mér einn tvöfaldan double-espresso latté frappuccino á Café Korg fyrir Westan.

Hvaða endemis ruglumbull?

Ekki veit ég hvernig Jóni hugnast að við getum betur unnið úr málum okkar þegar við erum höfum ekki eigin mynt of þ.a.l. engin vopn til að takast á við stóráföll eins og þau sem við erum að lenda í þessi misserinn. Að sama skapi fannst mér kjánalegt að hafa verið að eyða stórfé frá IMF til þess að reyna að halda Krónunni á of háu gengi: Rússar og Brassar gerðu það sama og það gerði bara illt verra þangað til gjaldmiðlarnir hrundu óumflýjanlega og endanlega og löndin gátu farið að takast á við vandann eins og hann var, sem var til mikilla bóta fyrir bæði lönd. En það er önnur saga (sjá hér) þó að Jón hafi, ef mér skjátlast ekki, stutt þessi mistök heilshugar þegar við gerðum þau hér.

En ég er enginn Hagfræðingur--sem hann Jón er þó að hann sé ekki alveg að tala um sína sérgein (miðað við Doktorsritgerð hans, altént) og öll reynsla hans sem hagfræðings sé til komin á síðustu sex árum. Á hverjum tíma heimurinn hefur sýnt okkur að hagfræðin sem hann lærði var kannski ekki svo hagkvæm eftir alltsaman. 

Katrín Ólafsdóttir... tja, svo ég vitni bara beint í hana sjálfa:

"Við erum sammála um að hagsmunum íslensku þjóðarinnar verði best borgið innan ESB og með upptöku evru. Þess vegna viljum við að þegar verði sótt um aðild að ESB og gengið frá aðildarsamningi þar sem heildarhagsmunir þjóðarinnar eru hafðir að leiðarljósi."

Það er því skiljanlegt að hún hallist að annarri mynt. Haraldur Haraldsson hefur líka gert henni betur skil en þessi aumi netverji getur hér, en það er að vísu útaf alveg ótengdu máli; bendi bara á þetta til að sýna hver Katrín er og vona að Haraldur taki því ekki illa (þar sem ég hugsa að hann sé hreint ekki sammála mér í þessu rausi mínu). 

Afhverju það sé nauðsynlegt að borga niður 40 milljarða á ári næstu fjögur ári get ég svo engan veginn skilið, sérstaklega í ljósi þess að þeir Hagfræðingar sem ég hef lesið, t.d. Steve Hanke og Mark Weisbrot eru algerlega ósammála því og þeir eru reynsluboltar og sérfræðingar í alþjóðahagfræði. Svo ég vitni í Weisbrot: "[...]It is neither necessary nor desirable for a government to balance its budget during a recession, when tax revenues typically fall, and social spending rises."

Drottin almáttugur, hverju nafni sem þú kallar þinn, bjargi Íslandi frá því að þetta sé fólkið sem við erum að treysta fyrir því að leiða þjóðina í gegnum þessa vandasömu (en þó ekki heimsenda-) tíma. 

Farið vel með hvert annað þarna úti, það er ókeypis og hjálpar öllum, þó það sé kannski ekki að fara að borga upp íbúðar-, og/eða bílalánin þín.

Tilrauninni með sjálfstæða mynt lokið

Ekki nýtt, ekki rétt

Varla þykir mér þetta vera ný uppfinning--ég hef t.d. sjálfur átt NIA (samkeppnisgræja frá OCZ) í allavega hálft ár. Að auki er ekki hentugt að nota bara heilabylgjurnar til að stjórna heilum leik (nema þá kannski Pong), langoftast er hentugast að nota músina til að miða og græjuna til að ganga/hlaupa/skríða/hlaða/skipta um vopn o.sv.frv. Í ofanálag hefur þetta alls ekkert með leti að gera, og raunar er þónokkur vinna að læra á græjuna svo að maður geti notað hana sómasamlega. Aðalástæðan fyrir því að nota þessi tæki er sú að þau geta minnkað viðbragðstímann (frá því að nota lyklaborð+mús) um allt að 50%--og það munar um minna fyrir harðjarna leikjaspilara. Sjálfur er ég varla einn slíkur og nota NIA mjög lítið; ég keypti þetta meira afþvi mér finnst þetta dásamleg tækni og finnst gaman að eiga svona.

Hvernig stendur á því að tæki í eldra kantinum sé kynnt á mbl.is sem splunkuný uppfinning? Og það er augljóst að sá sem þetta skrifaði (eða þýddi) hafði hvorki fyrir því að kynna sér tækið né tæknina. Er þetta orðið staðallinn á mbl.is eða slysaðist blaðamaður máske til að mislesa auglýsingu einhversstaðar sem frétt? Ég er mjög líklega einn um það en mér finnst þetta stórfurðulegt mál alltsaman. Þetta fær mig þó til að vilja blása rykið af NIA og grípa aðeins í Call of Duty aftur, sem er allavega eitthvað.

Stýra tölvu með heilaorkunni